ဂါဇာစီးတီး၊ ဇူလိုင်-၂၆-၂၀၂၅
ရတီ(VOM)
ဂါဇာမှာ လူသုံးယောက်ကို တယောက်နှုန်း သို့မဟုတ် လူဦးရေသုံးပုံတပုံဟာ ရက်အတန်ကြာ အစာရေစာ ပြတ်လပ်နေကြောင်း ကမ္ဘာ့စားနပ်ရိက္ခာအဖွဲ့ (WFP) က သတိပေးလိုက်ပါတယ်။
ဂါဇာမှာ အမျိုးသမီး နဲ့ ကလေးငယ် ကိုးသောင်းကျော်ဟာ အာဟာရချို့တဲ့မှုကြောင့် အရေးပေါ် ကုသမှုလိုအပ်နေပြီး ဂါဇာမှာ ဖြစ်ပွားနေတဲ့ လူသားချင်းစာနာမှု အခြေအနေတွေနဲ့ပတ်သက်ပြီး ကမ္ဘာ့ကျန်းမာရေးအဖွဲ့အပါအဝင် အကူအညီပေးရေး အဖွဲ့တွေကလည်း သတိပေးမှုတွေ ရှိနေပါတယ်။
ဇူလိုင် ၂၅ ရက်မှာ လူ ကိုးယောက် ထပ်မံသေဆုံးခဲ့ပြီး စစ်ပွဲစတင်ကတည်းက အာဟာရချို့တဲ့မှုကြောင့် သေဆုံးသူအရေအတွက် ၁၂၂ ယောက်ထိ ရှိလာတယ်လို့ ဂါဇာ ကျန်းမာရေးအာဏာပိုင်တွေက ဆိုပါတယ်။
အစ္စရေးကတော့ အကူအညီများ ဝင်ရောက်မှုကို ကန့်သတ်ထားတာမရှိဘူးလို့ ဆိုထားပြီး အာဟာရချို့တဲ့မှုအတွက် ဟားမတ်စ်တို့ကို အပြစ်တင်ထားပါတယ်။ လာမည့်ရက်အနည်းငယ်အတွင်း ဂါဇာကို လေကြောင်းကနေ အကူအညီများချပေးတာကို ခွင့်ပြုနိုင်ကြောင်း အစ္စရေးအစိုးရ အရာရှိတယောက်က ပြောပါတယ်။
ဒါပေမယ့်လည်း အခုလို ပစ္စည်းတွေချပေးတဲ့နည်းလမ်းဟာ မထိရောက်ဘူးလို့ အကူအညီပေးရေးအဖွဲ့တွေက သတိပေးခဲ့ဖူးပါတယ်။ ယူအေအီးနဲ့ဂျော်ဒန်နိုင်ငံတို့ဟာ ဒီနည်းလမ်းနဲ့ အကူအညီတွေ ပို့မယ်လို့ ဆိုထားပေမယ့် အစ္စရေးရဲ့ ခွင့်ပြုချက်မရသေးဘူးလို့ ဂျော်ဒန်တာဝန်ရှိသူတယောက်က ပြောပါတယ်။
ဒီအစီအစဉ်မှာ ပါဝင်မယ်လို့ ဗြိတိန်ကလည်း ထုတ်ဖော်ပြောဆိုလာပါတယ်။ ပြင်သစ်သမ္မတ မက်ခရွင်္နကတော့ ပါလက်စတိုင်းနယ်မြေကို နိုင်ငံအဖြစ် အသိအမှတ်ပြဖို့ကို မကြာမီမှာ တရားဝင်ကြေညာမယ်လို့ ဆိုထားပြီး ဒီကိစ္စအပေါ် အမေရိကန်နဲ့ အစ္စရေးက ဝေဖန်ထားပါတယ်။ ပါလက်စတိုင်းကို နိုင်ငံအဖြစ် အသိအမှတ်ပြုရေးအတွက် ဗြိတိန်ဝန်ကြီးချုပ် စတာမာကိုလည်း လွှတ်တော်အမတ်တွေက တောင်းဆိုမှုတွေ ရှိနေပါတယ်။
Ref:BBC
